Pa visambizgo na ma upharazgi ghose agho Yesu wa ku Nazareti wakasambizga na kupharazga, palije ivyo ndi vyakuzirwa na vyakuwuska mphindano kuluska chisambizgo cha Ufumu wa Chiuta. Basambiri wose bakupulikana kuti chisambizgo icho Yesu wakabikapo mtima chomene, icho wakasambizga na kupharazgapo chomene, ntchisambizgo cha Ufumu wa Chiuta. Chikaba chisambizgo chake cha chiponosko, ndondomeko yake yikuru, na chisambizgo cha mtima wake nkhanira. Mwachitima chomene, mpingo wasono ukuwoneka kuti ukubikapo mtima chara pa ivyo Yesu wakabikapo mtima kuti ndi vyakuzirwa chomene pa utebeti na uchimi wake pakuba Mesiya. Chigomezgo chithu ntchakuti mtima winu ukorekenge na uthenga wa Ufumu wa Chiuta, Fumu na Ufumu wake, nakutiso muwone kuzirwa kwake pa umoyo withu nga mbasambiri ba Yesu Khristu, nga mba tebeti ba uthenga wa Chiponosko.
Muvisambizgo vithu vinayi, buku ili mwaufupi chomene, likupereka makani gha muwuso wa Chiuta. Makani agha ghakufumira muvidumbirano na umo Chiuta kajiyimire na Fumu, wakachomboreka na Satana na banthu bakwamba, Adamu na Hava, kufika pa kuwusa kwa Chiuta mwa Yesu Khristu pa kwiza kwake muno mucharu. Sono pakuti Fumu yithu Yesu Khristu wali kufwa, wakawuka, na kukwelera kuchanya, Ufumu wa Chiuta ukupharazgika mucharu chose kwizira mumpingo wake. Kuwusa kwa Chiuta kuti kwize pakwizaso kwa Yesu Khristu, apo nyifwa, matenda na uheni wose viti vimare, charu chose na kuchanya viti vibe vipya, ndipo Chiuta wati wabe vyose ku vyose.
