Panji tingayowoya kuti palije chinthu chakuzirwa chomene pakabiro kaumoyo wa Mpingo kuluska kachitiro kawurongozgi. Chiuta wali kuwuska barongozgi bavyawanangwa vyawo, banarume na banakazi, mwakuti bapwelelere banthu pakupereka urongozgi uwo ngwakuchizga na kutumbika banthu mumpingo. unenesko wose ngwakuti, awo bali kuchemekera kuwurongozgi uwu bakurongora kujipereka kwawo kwa Khristu Mponoski pakuchita wurongozgi wenewuwo ukupereka ntchindi na marumbo kwa Chiuta na kuchiska banthu apo bakuzengekera mwa Khristu.
Chisambizgo ichi chikulabiska pa vinthu vinayi ivyo vikukhwaska urongozgi wachikhristu. Tambenge kulabiska pa urongozgi uweme wa chisopo, pakudodoriska upharazgi, kusambizga Mazgu gha Chiuta na kachitiro ka masakaramente mumpingo. Tilabiskengeso pa udindo wa murongozgi pa visambizgo vya chikhristu, pakulabiska chomenechomene umo tikupokelera bakhristu bapya mumpingo. Mwakusazgirapo, tidumbiskanenge fundo ya Kulera na kukuzga banthu muwumoyo wa uzimu mwakuti banthu bakhare na nkhongono na kukura mwakwenelera. Mwakurondezgapo, tilabiskenge pa kachitiro kakupereka chirango kwa awo bananga panji kubuda mumpingo na kurongora kuzirwa ka ndondomeko iyi mumpingo. Tijarenge chisambizgo ichi pakulabiska kachitiro kawurongozgi (conseling) kubanthu mundondomeko yachikhristu. Ulato withu ngwakuti tipulikiske makora kuchizgika uko kukwiza kufumira kuwurongozgi wa wuliska na kuwurongozgi wa chikhristu apo tikurongozga banthu muchipulikano apo bakukumana na mawunonono pa umoyo wawo pakunyekezgeka mulwendo wawo wa chikhristu.